in conspectu tuo

El númberu 32 de la revista cultural EL SÚMMUM ta acabante salir a la cai. La publicación pue garrase de baldre nos centros y sales culturales de Cajastur n’Uviéu, Xixón, Mieres, Avilés y Llangréu y n’otros puntos de distribución d’eses ciudaes.

Nesti númberu nuevu, la revista inclúi dos entrevistes: una col poeta Francisco Alba y otra col escritor Ramón Lluís Bande. El primeru publicó hai unos meses el poemariu El contrario (Pre-Textos), qu’afita la so voz como una de les más suxerentes del panorama poéticu estatal nos nuestros díes, mentes que’l segundu va poner nunos díes nes llibreríes el volume Les habitaciones vacies (Ámbitu), un llibru onde axunta tola so narrativa completa dende Verdá o consecuencia hasta Depués, el silenciu. Bande caltién una conversación llarga y posada col tamién escritor Chus Fernández que queda recoyida nesti númberu nuevu d’EL SÚMMUM.

La lliteratura tamién ta presente con un artículu estensu sobre Juan Benet y con testos de creación de Marta Mori -n’asturianu- y Moncho Martínez Castro -en gallego-asturianu-.

La crítica musical sigue siendo un elementu bien importante dientro de les páxines d’EL SÚMMUM, que nesti númberu analiza los últimos trabayos de Love of Lesbian y Depeche Mode. Amás, Víctor Vila percuerre la trayectoria de José Ignacio Lapido. Diego Díaz, pela so parte, publica un artículu sobre la última aventura en cómic de Max Fridman y fai un análisis detalláu de lo que significó la Revolución de los Claveles. El proyectu Milkabouts del fotógrafu Fernando Bayona ocupa tamién un bon espaciu dientro d’esta edición y lleva una de les sos imáxenes hasta la portada. María Arce, pela so parte, fala de la situación sociopolítica d’Oaxaca, y Henrique G. Facuriella apurre un testu y delles fotografíes d’un viaxe a Belfast.

[Testu publicáu en lesnoticies.com]

Robert Louis Stevenson escribía d’acuerdu con  William Hazlitt que nada había meyor pa la salú del espíritu que’l paséu en soledá. En compaña namái de les impresiones que la naturaleza nos crea. Nada como l’escaezu («tres hores diaries») de la carga social cuayada d’imáxenes ya emblemes con requisitories, obligaciones ya cumplimientos.

Nesi estáu, el caminar habría dar felicidá al pensamientu optimista de Hazlitt o enerxía vital al románticu de Stevenson, amás de conocimientu.

Henrique Facuriella recueye’l so legáu, anque lu trespase a les llendes más modestes d’una mirada que debe poco a la esperanza d’antaño.

Tien d’ellos el poder d’ensimismase, de somorguiase na vida del instante. Pero, agora, el paséu hixénicu, cercanu ya cotidianu, algama otres metes. La mirada yá nun busca tanto la novedá del esterior como convertir la observación de la redolada na metáfora d’una distancia: la de la escura ponte que separta’l deséu de la so imaxe. Pero, tamién, n’otros momentos, indaga sobre la llende esnidiosa qu’estrema la voz narrativa del so compañeru de viaxe, que lu observa siempre ya, a veces, inclusive-y entruga.
Intersticios monta impresiones varies sobre un escenariu escuetu, afuxidizu, como los trenes que pasen cargaos de lluz hacia horizontes imprevistos. Los nomes de les ciudaes visitaes nun sorrayen una estampa turística (nun tengo claro que la ilustración de la cubierta, anque guapa, nun llame a engañu), pues, son, pienso, más que nada resonancies efímeres d’estaciones d’un viaxe que nunca acaba. Nun pue, porque’l narrador atiende más a la entruga del que se busca ya menos a la descripción del puntu inmóvil onde ordena’l so espaciu temporal: una talaya soberana que-y permita otiar acullá de lo previsible.

Con instantes de dubia, d’estrañamientu, d’impresiones sobre una redolada conocida, con apuntes suxeríos baxo una lluz poética, con síntesis de guión cinematográficu, compónse’l puñáu de páxines d’esti llibru. Unos trayectos en prosa elegante que presta lleer como un poema amenu.

Facuriella llogra un llibru de viaxe al interior d’un yo contemporaneu, davezu fragmentáu ya desilusionáu, ensin otru horizonte que la busca d’un yo inaccesible, de puru ideal ensin referentes creyibles.

Pa nós queda como un cuadernu d’apuntes pa llevar con ún, llixeru ya suxestivu. La trama principal ye la so escritura, ya la indagación sobre lo que vemos ya lo que somos quien a querer ver. Con estructura de tables perfilaes embona un techu que, anque nunca del too zarráu, algama xacíu poéticu.

Ye siempre bienveníu’l riesgu na lliteratura, el pulsu col propiu valor d’escritor pa nun conformase col riegu abiertu n’andecha anterior. Na lliteratura de nós nun ye mui frecuente’l compromisu cola propia escritura, quiciabes porque na necesidá de comunicar lleva la delantera’l ritu consagráu poles tradiciones. Normal, pero quiciabes por eso presta tanto atopase con testos que busquen un llector cómpliz, que nun renuncie de mano a nada, que nun tenga mieu al tiempu del pasiante solitariu, que nun busque na secuencia siempre un ciclu argumental… que busque’l fiel na esencia de cada fueya finada.

L’apuesta ye dura porque la razón práutica llévanos a siguir les güelgues d’una materialidá que nun se conforma cola busca permanente, anque venga dictada, ya xustificada, como n’Intersticios, baxo l’aureola encadenada del deséu.

Testu de Xosé Bolado sobre’l llibru Intersticios (Ámbitu, 2008), d’Henrique Facuriella, publicáu na revista El Súmmum nu. 30.

Trescribo ún de los testos que se publiquen, enriba de la foto que veis equí, nel númberu 29 de la revista El Súmmum. Correspuende al llibru inéditu –y inconclusu– In somnis apparuit (Álbum de suaños). La semeya ye d’una obra del asceta y artista multidisciplinar Daniel Franco que custodio en mio casa. Na revista en papel apréciense munchísimo meyor tolos detalles, poro, anímovos a los qu’andéis per Asturies a qu’intentéis localizala esta selmana (si ye que vos da tiempu antes de que desapareza):

III

Miro pela ventana de la sala onde dos patronistes dibuxen vistíos en papel. Ye un tercer pisu y tanto’l suelu como les ventanes son de madera vieyo pero cuidao. Una d’elles avérase a mi y fálame del espíritu con palabres como les d’una mística. Tamién la otra vien hasta onde tamos pa continuar el discursu de la compañera y noto que les sos palabres fierven al falar d’una esperiencia que naz nelles y que les sobrepasa. Tol so trabayu empápase d’esti agua ferviendo.

Depués véome na cai. Tres de mi ta la casa, al par d’otres munches, antigues toes, como eses que formen la primer llinia de playa nes villes marineres. Onde tenía qu’haber mar, sicasí, estiéndese un ermu de tierra y peñones cubiertu por un cielu gris igual que plomu. Mentalmente, pero al mesmu tiempu como en figura que flotare enfrente mi, preséntaseme A. y falo con ella sobre si sedrá apropiao invocar la nube. Ella dizme que lo faiga.

–Pero nun voi favorecer a naide, ye namás por ver qué pasa –respuéndo-y ensin convenceme siquiera a mí de nun facelo.

Alzo, entós, les manes y el cielu concéntrase primero nun gris más negru antes d’empezar a llover. L’ermu emprima a llenase d’agua y va garrando la figura d’un mar nel qu’hasta se formen foles.

Cuando l’agua va llegar onde yo, baxo les manes y subo les escaleres de la casa les patronistes. Esta vez, sicasí, quedo nel segundu pisu, onde ta’l taller de costura. Llámame l’atención que tolos trabayadores sían homes, paisanos fechos y derechos sentaos a les máquines o cosiendo a mano, con dedal y buya. Arrímome a la ventana, que fai de marcu a la mar recién creada, y contemplo, como un espectáculu dignu de ver, a toos esos homes trabayando. Ún d’ellos llégase a mi y pregúntame:

–¿Quies que salgamos a cenar xuntos?

Y lo que siento ye un apuru mui grande porque nun sé si taré a l’altura de tantu honor.

Vida negra, lluz negra, felicidá negra. Ghana, Benin. África. Los habitantes d’Europa tamos yá poco avezaos a la guapura qu’espeyen estos retratos. La mayoría de nós inora qu’un día fuimos como ellos, que tuviemos vides reales y carne y sangre que sintíen al llau d’otra carne y d’otra sangre, que carecimos fame y sede de xusticia, que sufriemos. Y qu’amemos. El nuestru amor ye virtual, nun cria raigaños y nun da frutos. La guapura de nós ta plastificada, mediatizada, clasificada y calificada, corrompida. Quitámos-y al cuerpu la fuerza del escándalu y con ello comerciamos. Dolémonos menos d’un ser que muerre que de lo que pueda baxar la nuestra mini inversión inmobiliaria. Y, asina, invertíos, facemos que vivimos. Andamos permanentemente anestesiaos, dormíos pero ensin suaños, convirtimos el mitu nuna regla pa presentase en sociedá.

La maestría de Paula Recarey va más allá de la pura técnica fotográfica. Más valioso que l’encuadre y que’l dominiu del color, yá de por sí impecables, ye la potencia d’estos retratos pa facer qu’esconsonemos, pa xiringar la nuesa sensibilidá adormecida y danos cuenta de que’l progresu y les comodidaes nun pueden ser a costa de perdenos a nós mesmos y desaniciar la capacidá humana del alcuentru verdaderu col otru. Estes semeyes falen más de nós que de los que tán nelles retrataos. Inda más, Paula fai posible qu’ellos nos falen.

(Foto de Paula Recarey y testu d’Henrique G. Facuriella. Reportaxe completu publicáu n’El Súmmum, nu. 28)