in conspectu tuo

Feliz Pascua de Resurrección a toos. A los que creéis y a los que non, porque Cristo resucitó pa tol mundu. Lo que sigue ye la secuencia Victimae paschali laudes, de la Misa de güei:

Victimae paschali laudes
inmolent Christiani.

Agnus redemit oves:
Christus innocens Patri
reconciliavit pecatores.

Mors et vita duello
conflixere mirando:
dux vitae mortuus,
regnat vivus.

Dic nobis Maria, quid vidisti in via? Sepulcrum Christi viventis,
et gloriam vidi resurgentis,
angelicos testes, sudarium et vestes

Surrexit Christus spes mea;
precedet suos in Galileam.
Scimus Christum surrexisse
a mortuis vere.

Tu nobis victor Rex, miserere.

Amen. Alleluia.

De la Oración pola Unidá de los Cristianos 2009:

DÍA SEXTU
Les nuestras ilesias, anque tovía separtaes, son toes conscientes de la compasión del Señor pa colos que sufren. Los cristianos siempre siguieron el so exemplu cuidando d’enfermos, construyendo hospitales, botiquinos, organizando consultorios médicos y nun preocupándose namás que del alma, sinón tamién del cuerpu de los fíos de Dios. Una comunidá de reconciliación pue nacer namás cuando los enfermos tienen esperiencia de la presencia de Dios nes sos relaciones coles hermanes y hermanos en
Cristo.
Señor, atiendi pal to pueblu cuando te grita, carcomíu pola enfermedá y el dolor.
Que los que tán bien de salú te dean gracies pol so bienestar.
Que puedan sirvir a los que sufren con un corazón cariñosu y manes abiertes.
Señor, danos a toos vivir na to gracia y la to providencia, pa llegar a ser una comunidá de reconciliación onde toos xuntos t’allaben. Amén.

De la Oración pola Unidá de los Cristianos 2009:

DÍA QUINTU
A lo primero del mundu, los seres humanos creaos a imaxe de Dios nun yeren más qu’ún na so mano.
El pecáu, sicasí, metióse nel corazón del home y, d’entós p’acá, nun acabemos de construir categoríes discriminatories: equí, sobre la raza o la etnia faise la esbilla; nesti sitiu ye la identidá sexual o’l simple fechu de ser home o muyer lo qu’alimenta los prexuicios; n’otru sitiu ye la relixón el factor d’esclusión. Toes estes discriminaciones son deshumanizadores. Son fontes de conflictos y de sufrimientos grandes.
La unidá recuperada de la familia humana ye la misión común de tolos cristianos: xuntos, hai que trabayar contra cualisquier discriminación. Ye tamién la so esperanza compartida: porque toos nun son más qu’ún en Cristu, y nun hai más xudíu nin griegu, esclavu nin llibre, home nin muyer.
Señor, fai que nos decatemos de les discriminaciones y les esclusiones que marquen les nuestres sociedaes.
Guía la nuestra mirada y ayúdanos a reconocer los prexuicios qu’habiten en nós.
Qu’aprendamos a desterrar cualisquier despreciu y a gustar la gayola de vivir xuntos na unidá. Amén.

De la Oración pola Unidá de los Cristianos 2009:

DÍA CUARTU
Dios creó’l nuestru mundo con sabiduría y amor. N’acabando la obra de la creación, Dios vio que too yera bono.
Pue vese’l puestu central qu’ocupen los elementos de la natura nes paráboles y na enseñanza de Xesús. Pa la grana más pequeña, Cristo manifiesta un respetu pergrande. Col encontu de la visión bíblica de la creación, los cristianos pueden contribuir con una mesma voz a la reflexón actual sobre’l futuru del nuestru planeta.
Dios creador, tu creasti’l mundu cola to Palabra y visti que too yera bono. Pero güei facemos obres de muerte y destruimos ensin remediu’l nuestru mediu ambiente.
Danos l’arrepentimientu de les nuestres avaricies, ayúdanos a cuidar poles tos criatures. Xuntos, queremos guardar la creación. Amén.

De la Oración pola Unidá de los Cristianos 2009:

DÍA TERCERU
Dios de xusticia, nel nuestru mundo hai sitios encorrompinaos d’alimentu, pero n’otros nun hai abondo, onde los famientos y los enfermos son un ensame.
Dios de paz, hai nel mundu xente que s’aprovecha de la violencia y de la guerra, mentanto qu’otros, por culpa de la guerra y la violencia, vense aforciaos a abandonar so casa y a topar abellugu n’otru sitiu.
Dios de compasión, ayúdanos a comprender que nun podemos vivir namás que de dineru, sinón qu’habemos vivir de la Palabra de Dios. Ayúdanos a comprender que nun podemos llegar a la vida y a la prosperidá verdadera si nun ye amándote y obedeciendo la to voluntá y les tos enseñances.
Pidímostelo nel nome de Xesucristu, Señor nuestru. Amén.

De la Oración pola Unidá de los Cristianos 2009:

DÍA SEGUNDU
Señor, tu que te sacrificasti sobre la cruz pola unidá de los homes, ofrecémoste la nuestra humanidá mancada pol egoísmu, la soberbia, la vanidá y la ira.
Señor, nun abandones al to pueblu oprimíu que carez toles formes de violencia, d’ira y d’odiu, víctima de creencies falses y diverxencies ideolóxiques.
Señor, estiende pa nós les tos manes compasives y cuida pol to pueblu, pa que gocemos de la paz y de l’allegría que fain parte del orde de la to creación.
Señor, fai que nosotros, cristianos, trabayemos xuntos pa que se cumpla la to xusticia más que la nuestra. Amén.

«Van tar uníes na to mano», de la Profecía d’Ezequiel (cap. 37, ver. 17), foi’l lema del Octavariu d’Oración pola Unidá de los Cristianos de 2009, que se celebró ente’l 18 y el 25 de xineru. Nel monesteriu de San Pelayo d’Uviéu, tolos díes depués de la llectura breve nel Oficiu de Laudes, lleíase un cachín del llibrín coles oraciones pa esta selmana editáu pol Pontificiu Conseyu pa la Unidá de los Cristianos y la Comisión Fe y Constitución del Conseyu Ecuménicu de les Ilesies. Voi trescribir nesti y en posts sucesivos los testos que sintí en San Pelayo y que, llueñe d’oponese al humanismu laicu, espeyen cómo ésti tien nel Evanxeliu’l so raigañu y la so culminación.

DÍA PRIMERU
La unidá cristiana ye una comunión que se funda na nuestra pertenencia a Cristo y a Dios. Convirtiéndonos más a Cristo, descubrímonos reconciliaos pola fuerza del Espíritu Santu. Orar pola unidá cristiana ye reconocer la nuestra confianza en Dios, ye abrinos totalmente al Espíritu.
Dios compasivu, tu ámesnos y perdónesnos en Cristo, tu quixisti reconciliar a tol xéneru humanu nel to amor redentor. Mira con bondá a tolos que trabayen y oren pola unidá de les comunidaes cristianes dividies. Danos ser hermanos y hermanes nel to amor. Que podamos ser uno, uno na to mano. Amén.

Taba lleendo’l llibru de C. S. Lewis The pilgrim’s Regress (publicáu n’español por Planeta como El regreso del peregrino), cuando atopé un cantar puestu na boca del protagonista de la hestoria. Como yera de nueche y yá taba na cama, aproveché esi poema como himnu pa la oración de Completes y equí lu trescribo traducíu:

El mio corazón ta vaciu. Toles fontes qu’habríen manar
con ansies, en mi yacen seques.
En tola mio tierra nun hai siquier una gota
que tenga nel mar la meta.
Nun me preocupa lo que’l to amor pueda ofrecer,
namás la inutilidá del momentu
y l’apetencia del momentu, sutilmente, al ceder
y tar llibre de tormentu.
Ó, tu que yes incansable, tu, que nin faes nin duermes,
nin t’adormeces, tu que t’ocupasti
del cuidáu de Llázaro na descuidada tumba, tu pues,
hasta que yo espierte, velame.
Si pienses por mi lo que yo nun puedo pensar, si desees
por mi lo que yo
nun puedo desear, la Forma interior de la mio alma, qu’espera
fondamente enterrada, nun ha perecer,
non más que la insensible simiente aventada que miedra
na madurez iverniza pa nacer,
porque, mentes qu’olvida, el cielu recordando ufierta
duce fueru calmu na tierra,
porque’l cielu, moviéndose como una caparina cola to guapura, acorícase
xirando alredol de la tierra.

Na semeya, el padre Jorge Gibert echa agua bendito sobre la cabeza de los monxos al terminar del oficiu de Completes, enantes de dir pa la cama, nel monesteriu de Santa María de Valdediós.

Trescribo traducida la llectura breve que fixeron güei les monxes pelayes d’Uviéu nel oficiu de laudes. Nun ye la que marca’l breviariu pero elles tamién saluden la esperanza qu’albidra’l mundu:

Is 58, 6-8 • L’ayunu que me presta a mi consiste nesto –oráculu del Señor–: en que ruempas les cadenes de la inxusticia y desates los ñuedos qu’aprieten el xugu, en que dexes llibres a los oprimíos y acabes con cualquier tiranía; en que compartas el pan col que tien fame y recibas en to casa al probe ensin techu; en que vistas al que nun tien ropa y nun dexes d’avalir a los tos semeyantes. Entós la to lluz va rellumar como l’amanecer y les tos ferides van sanar lluego. La to rectitú va dir delantre ti y la mio gloria va dir detrás.

L’Asociación Cubera de Amigos del Paisaje de Villaviciosa convoca’l domingu 25 de xineru a asistir a misa de 12 na ilesia del monesteriu de Santa María de Valdediós como muestra d’apoyu a la comunidá cisterciense que vive ellí y que, al otru día, van ver cómo se fai públicu’l decretu de la so supresión. Del llunes p’alantre, el padre Jorge, el padre Massimo, frai Laurence y frai Javier van tar de prestao na so propia casa, na casa pola que dieron los últimos años y, en dalgún casu, hasta la salú. Una casa que siempre tuvo les puertes abiertes pa cualquiera que llegare allá, dalgo que se notó’l domingu pasáu, cuando xente de munchos sitios llenó la ilesia del monesteriu pal oficiu de Víspores nel actu d’acompañamientu y homenaxe convocáu pol Foru Gaspar García Laviana.

Dicía estos díes na prensa frai Laurence que la xente despidíase d’ellos como nun funeral y nun ye pa menos. A munchos va faltanos una pata mui importante de la nuestra vida espiritual. ¿O ye que la mio historia personal diba entendese igual ensin les estancies anuales en Valdediós? Cualquiera que me conoza sabe bien que non. Nun hai espaciu que más fotografiara que’l claustru del monesteriu.

La primer vez que m’agospiaron en Valdediós sentí, al marchar, una sensación como si fuere pal exiliu, como si marchare de la mio propia casa, del sitiu onde quiciabes yera más auténticamente yo. Si dalguna vez tuvi vocación monástica, ésta queda zarrada tres del portón d’entrada al monesteriu de Santa María cuando’l padre Jorge-y dea la última vuelta a la llave. Pero antes hai que tar con ellos y la ocasión del domingu ye bien bona.

Anque too esto tenga’l gustu amarguxu de los funerales, como cristianos sabemos que la muerte nun ye l’acabamientu de la vida y que d’esta «muerte», si la ponemos nes manes de Dios, van salir munches vides nueves. Toi convencíu d’ello. Ellí onde teais, padre Jorge, padre Massimo, Laurence y Javier, seguíi rezando por nós.