in conspectu tuo

Emperador Shunzhi

El té mariello ye ún de los tés más raros pero tamién más finos que se pueden atopar. Trátase d’un té d’oxidación mui llixera en condiciones de temperatura y humedá altes, pero que se para rápido con un golpe de calor secu. Foron monxos budistes y taoístes los qu’empezaron a producilo hai munchos sieglos y, antiguamente, taba acutao namás qu’a la familia imperial. Tovía anguaño, produzse mui poca cantidá, mayormente en dos provincies del interior de China: Anhui (centru-oriente) y Hunan (sureste).

De Hunan provién la variedá Jun Shan Yin Zhen (Aguyes de Plata del Monte del Caballeru), un té de primeros d’abril considerao’l rei del té mariello. En seco, les fueyes son d’un verde tostao, tirando a beige. Aparecen enteres, apretaes y rectes, enrollaes a lo llargo col brotu dientro, del que s’aprecia la pelusa blanco. Miden unos dos centímetros, como correspuende a la fueya nuevo.

Ye ún de los tés más apropiaos pa bebelos directamente del gaiwan (concu con platu y tapa) porque, anque’l tiempu d’infusión ta ente los dos y los tres minutos, nun amarga si se dexa más tiempu ente l’agua. Asina, depués de calentar el concu, ponense dos cuyaraes rases de té y échase enriba l’agua a 85 ºC. A partir de los dos minutos pue empezar a bebese garrando’l platu con cuatro deos d’una mano per debaxo y el pulgar nel borde del concu, mentes s’aparten les fueyes cola tapa, que se garra cola otra mano.

El fervinchu ye mui suave y, si se arrima l’interior de la tapa a la nariz, apréciase un golor que recuerda a lo de la corteza de los árboles y a lo de les castañes. El sabor ye mui especial, tien un aire a lo del té blanco pero muncho más posao. Trai a la cabeza tierres de cereal o yerba curao, pero ensin que sía’l sabor del fervinchu. Na boca, anque nun ye nada secante y tira más pa lo dulce que pa lo amargo, el tastu al raspiar la llingua col paladar ye como la seda selvaxe. El sabor ye de lo más prestoso, difícil que-y disguste a naide. Como muncho, los paladares poco avezaos a los sabores sutiles atoparánlo poco saborgoso.

Los efectos nótense tamién nel restu del cuerpu. Propicia un estáu de paz, d’equilibriu y d’harmonía que nun s’atopa n’otres races de té. Percíbese una sensación d’enerxía llimpio qu’arrodia la cabeza y da como una embriaguez serena, una enerxía que se concentra nes vidayes y penriba los güeyos.
El color del fervinchu ye d’un mariello dorao, fondo, relaxante. A la vista, da una imaxe mui potente de pureza y fuerza. Ye como una vestal. Favorez la concentración y la meditación, lo que lo fai mui amañoso como ritu previu a la oración. Los movimientos vuélvense lentos pero más conscientes. La respiración, más calma y más fonda. Da la sensación de que llimpia per dientro.

Ye tamién un espectáculu ver les fueyes nel gaiwan: unes echaes nel fondu, otres flotando na superficie y, les más, de pies, en vertical, ente entrambos los dos mundos.

La fueya húmedo caltiénse ciarrada sobre sí mesma. Al abrila, sal el brotu qu’en seco namás s’aldovinaba. Son de color verde amarellao, clarines. Los nervios de la fueya son delicaos y l’interior ye brillante. Ye ésta una de les fueyes de té más guapes. Proporciona un placer estéticu mui grande ver les dos primeres fueyes, perfeches, enmarcando’l brotu, que s’alza en mediu d’elles. El golor de la fueya húmedo recuerda al té verde mui nuevo y dulce, anque tamién a lo blanco de más calidá.

Publicao en Les Noticies nu. 734, 15/5/2011.