in conspectu tuo

Como lo prometío, débese, y la rosa yá lo pidió, equí va la receta de la tarta de cumpliaños que vos ofrecí la otra selmana:

Ingredientes

• 400 g de zanahoria tierno
• Media taza d’aceite d’oliva
• 1 taza de farina con levadurina
• Cuatro cuyaraes d’agua d’azahar
• Dos güevos
• 50 g d’almendra rallao
• 1 cuyarada pequeña de bicarbonatu
• 1 cuyarada pequeña de ‘jengibre’ y otra de canela
• 2 taces de zucre
• 200 g de quesu fresco
• media taza de lleche d’avena
• Un pizcu de sal
• 60 g de mantega

Ellaboración

Préndese la forna a 250 ºC.

Pélense, llávense y rállense les zanahories. El bol del robot bátense un minutu una taza de zucre, los güevos, l’aceite y un par de cuyaraes d’agua d’azahar. Échase allá la farina peñerao, la zanahoria, l’almendra, el bicarbonatu, les especies y la sal. Bátese otru minutu más.

Fórrase un molde de 22 cm de diámetru de borde desmontable con papel de barba o aluminiu engrasao. Espolvóriase media cuyarada de farina. Rellénase cola mestura. Métese a la forna 25 min. a 250 ºC el primer cuartu d’hora y báxase a 170 ºC el restu. Al meter una buya, ha salir llimpia. Depués de desmoldar, déxase esfrécer enriba la rexa la forna.

De la qu’esfrez, bátese’l quesu na batidora cola mantega blando, una taza de zucre y la lleche. Viértense a poco y a poco dos cuyaraes d’agua d’azahar mentes que se bate suaviquino.

Córtase’l bizcochón en dos círculos. Rellénase col quesu, móntase otra vez y cúbrese con más quesu. Métese una hora na nevera y sírvese.

Empiezo esti post con una cita d’un corréu priváu. Ensin que sirva de precedente, hai dos razones poles que lo faigo: nun cuenta nada que nun pueda sabese y méntaseme esplícitamente:

Ha llegado la hora de las celebraciones y los tirones de orejas y la tarta de Henrique (sólo cumplo años cuando Henrique cocina mi tarta. Ni antes ni después).

El cumpliaños celébrase esti sábadu, 21 de xunu, y ando piensa que te piensa na tarta que voi llevar esti añu. Porque, nun me negara naide que’l que daquién nun cumpla años si nun hai tarta fecha por ún enriba la mesa ye una responsabilidá bien grande. Tengo que confesar equí que cada vez me presta más cocinar esa tarta, cavilar los ingredientes y les sos combinaciones y, depués, embriagame coles sensaciones que produz nos otros. La selmana qu’entra, y si l’esperimentu gusta, prometo colgar equí la receta correspondiente.

Esti cumpliaños ye una fecha marcada nel calandariu con númberos de plata. Los últimos branos empiecen, pa mi, al xuntanos toos (diba ser meyor dicir toes, más que nada pola proporción un cachu mayor de muyeres nestos sabat) alredol de les veles d’aniversariu, seya en Xixón, en Llión o onde cuadre. Habiendo festexu, ta aseguráu el bon branu. Ye una celebración propiciatoria au se liben néctares en concos de carne y la naturaleza ufierta puertes abiertes a otres percepciones. Y, catalizadora de too, ta ella, rosa montesa de isla y mar y arena y agua de regueru que llimpia llaceries y amuesa, cristalino, los mensaxes del mundu.

El Conceyu Abiertu Pola Oficialidá acaba d’entamar la campaña «Yo doi la cara pola oficialidá». Copio, darréu,
el testu del comunicáu pa que sepáis lo qu’hai que facer si vos animáis a dar la cara.

La campaña Yo doi la cara pola OFICIALIDÁ consiste na recoyida masiva y esposición de semeyes individuales de persones con un mesmu cartel que lleva’l testu que da nome a la campaña. Pa eso ta yá colgada na rede la páxina www.doilacara.net, onde se pue atopar la información sobre la campaña, enllaces pa descargar y imprimir la fueya del cartel, tanto n’asturianu como en gallego-asturianu, y un corréu electrónicu al que mandar les semeyes: doilacara@gmail.com.

Ye una campaña diseñada pa llevar a tola ciudadanía asturiana la iniciativa de la defensa del nuesu patrimoniu llingüísticu. Trátase d’una propuesta abierta a la participación de toos y toes que dexa que cualquier ciudadanu o ciudadana pueda ser protagonista activu de la reivindicación de los derechos llingüísticos n’Asturies: dando la cara pola oficialidá y espardiendo la campaña ente les persones del so entornu, familiares, vecinos, compañeros de trabayu, asociaciones de tou tipu, etc, etc.

Ente los actos que van entamase nos próximos díes pa esparder esta iniciativa tán actividaes como la recoyida de semeyes per tolos campus universitarios d’Asturies, contactos informativos con más de doscientes asociaciones y una fiesta de presentación en La Casa Posafuelles (La Cuesta la Vega 10, Uviéu) el vienres 6 de xunu que vien. A partir d’ehí la campaña va siguir con un calendariu d’actos que llegarán a tolos conceyos d’Asturies.

La campaña Yo doi la cara pola OFICIALIDÁ va valir pa dexar claru’l respaldu mayoritariu de la sociedá asturiana hacia la reivindicación de la oficialidá. Tamién va valir p’apelar a la responsabilidá de los partíos asturianos representaos na Xunta Xeneral que tán nestos momentos debatiendo sobre los conteníos de la próxima reforma estatutaria. Ye’l momentu de que, ehí onde tovía permanezan, desapaezan d’una vez los prexuicios y les posiciones restrictives y se dea pasu a que se nos reconoza, por fin, el derechu a usar la nuesa llingua propia llibremente, ensin prohibiciones nin restricciones. Ye un derechu reconocíu na Constitución y que yá disfruten, dende va más de venticinco años, el restu ciudadanos del Estáu.